2 Samuel 7

Iatonna unnisung tu datu lan tongkonan layukna sia Nakamaseimo kamanamanan PUANG tang natumbu mintu’ ualinna tiku lao.

Ma’kadami datu lako nabi Natan, nakua: Aku te unnisungna’ lan tongkonan layuk kayu arasi’ na iatu pattinNa Puang Matua unnisung lan tenda dikulambu.

Mebalimi Natan lako datu, nakua: Melo ke mipalanda’i tu mintu’ tanan penaammi, belanna Narondongkomi PUANG.

Apa bongi ia dukato sae tu kadanNa PUANG lako Natan, nakua:

Malemoko, pokadanni taungKu Daud, kumua: Susite tu kadanNa PUANG: la mugaraganRa’ka misa’ banua, angKu torro lan?

Randuk dio mai allo Kusolanna tu to Israel tassu’ lan mai tondok Mesir sae lako allo iate, tae’ bangpa Kutorroi misa’ banua, sangadinna male bangNa’ salamba salao untorroi tenda sia kema.

IatongKu salamba salaopa sola mintu’ to Israel, denmoraka Kupokada sangbuku kada lako misa’i tu pangulunna suku to Israel, tu Kusua umpetayanni taungKu Israel, kumua: Ma’apai ammi tang unggaraganNa’ misa’ banua kayu arasi’?

Iamoto la muparampoan taungKu Daud, kumua: Iamote tu kadanNa PUANGna mintu’ ma’dandan maritik: Kupaleleko dio mai to’ riu maluna dio mai to’ domba, la dadi arungna mintu’ taungKu, iamotu to Israel.

Kurondongko umba-umba muola sia Kusabu’i tu mintu’ ualimmu dio tingayomu. Sia la Kupatarompo’ tu sangammu susi sanganna to tarompo’ lan lino.

Sia la Kupamanassan misa’ inan tu taungKu, to Israel, Kupamari’pii inde to, kumua anna torro dio inan manassa, da nadipatiramban lu lako lu dio mai sia da duka napakario-rioi to bulituk, susi tonna dolona,

randuk dio mai allo Kunii untappui tu to parengnge’ umparenta taungKu, to Israel. Na ikomo la Kuben kamanamanan tang la natumbu mintu’ ualimmu. Sia Napokadan dukamo PUANG, kumua PUANG la umbangunangko misa’banua.

Iake upu’mi tu allomu, sia ka’tu angin dipudukmu musanginanmo nene’ to dolomu, iamoto angKu patulangdanni tu bati’mu la ussondako, iamoto sun dikalemu, angKu pabantangi tu kadatuanna.

Iamo la umpabendanan misa’ banua sangangKu na Akumo la umpabantangi tu isungan kadatuanna tontong sae lakona.

Akumo tu la napoambe’ na iamo la Kupoanak. Iake umpogau’i kakadakean, la Kupa’dikki pebamba to lino sia la Kupandasa peada’na ma’rupa tau.

Apa iatu kamakarimmanangKu tae’ nala sorong boko’ dio mai kalena, susitu mangkamo Kupasorong boko’ dio mai Saul, tu Kupatoyangmo dio mai tingayomu.

Iatu banuammu sia kadatuammu la masae lako dio tingayomu, sia isungan kapayungammu la bantang sae lakona.

Susitu mintu’ kada iate sia susitu mintu’ dipaombo’na, susi dukamoto napokada Natan lako Daud.

Malemi tama tu datu Daud anna unno’ko’ dio oloNa PUANG, anna ma’kada, nakua: O Puangku PUANG, mindara te taumMi sia mindara tu to lan banuangku, anna baara’ Puang sae indete?

Iate apa iate bitti’ dio pentiroMi, o Puangku PUANG; iamoto mangkamo Mipokada tu diona bati’na taumMi tu apa la dadi lako tau iato mai, ke attu tang dipeamu’pa, sia iatu iannato, iamo pa’pangada’ Miben tolino, o Puangku PUANG.

Naapaopara tu la naparampo Daud lako kaleMi? Belanna Mitandai kalenamo tu taumMi, o Puangku PUANG.

Belanna kadamMi sia pa’inaamMi, amMi pogau’i te mintu’ apa mala’bi’ iate sia Mipaissananni taumMi.

Iamoto mala’bi’Komi, o Puangku PUANG, belanna tae’ misa’ tau dipasangtintiangKomi, sia tae’ tu Kapenomban senga’ sangadinna Kamu, situru’ tu mintu’ tobangna tama pa’perangingki.

Bangsa umbara tu ma’din dipasangtinti taumMi, iamotu to Israel, tu bangsa sangbua bannang dao te kuli’na padang, tu male Nala’bak Puang Matua nadadi misa’ bangsa lako Kalena, anNa padenani misa’ sanga, anNa pogauranni Puang penggauran kapua sia metakuran, la napomelo tondokMi, dio tingayona mintu’ taumMi, tu Mirampanan dio mai to Mesir sia dio mai mintu’ bangsa sia dio mai mintu’ deatanna.

Mangkamo Mipatontong tu taumMi Israel la Mipotau sae lakona na Kamu, o PUANG tu Kapenombanna tau iato mai.

Totemo, o PUANG Kapenomban, iatu kada tu mangka Mipokada diona te taumMi sia diona bati’na, pabantangi tontong sae lakona, ondongpi parampo randannai susitu kadamMi.

Iake susito la mala’bi’ tu sangamMi sae lakona, sia la nagente’ tau, kumua: Iatu PUANGna mintu’ ma’dandan maritik, iamo Kapenombanna to Israel, sia tongkonanna Daud, taumMi, la manda’ dio oloMi.

Belanna, kamu, o PUANGna mintu’ ma’dandan maritik, Kapenombanna to Israel, umpaombo’i lako pa’peranginna taumMi, Mikua: Aku la umpabendanangko misa’ banua. Iamoto anna potiakka’i penaanna te taumMi la umparampoi te passambayang iate lako oloMi.

O Puangku PUANG, Kamumora tu Kapenomban, sia mintu’ kadamMi tonganna. Kamumo tu mangka umpokadai te apa melo iate diona taumMi.

Totemo Mipamasakkemira te tongkonanna taumMi, kumua anna manda’ dio oloMi tontong sae lakona. Belanna Kamumora, o Puangku PUANG, tu mangka ma’kada, na tete dio pa’pamasakkeMi, iate tongkonanna taumMi la masakke tontong sae lakona.